Hën. Jan 24th, 2022
© Ndalohet kopjimi, riprodhimi dhe publikimi i informacionit pa cituar burimin e tij.
Pyetje dhe Përgjigje

Çka është komplementimi strukturë – funksion ?

Edhe pse ekziston mundësia që anatomia dhe fiziologjia të studiohen të veçuara nga njëra – tjetra , ato në të vërtetë janë të pandara . Kjo , sepse funksioni pasqyron gjithmonë strukturën . Pra , forma specifike e një strukture përcakton atë çka ajo është në gjendje të bëjë . Ky fakt përbën atë që quhet parimi i komplementimit ndërmjet strukturës dhe funksionit . P.sh. kockat luajnë rol mbrojtës për organet e trupit ( kafka mbron trurin ) , sepse në përbërje të tyre kanë depozita të bollshme minerale , të cilat e bëjnë shumë të fortë indin kockor . Po kështu , gjaku rrjedh në një drejtim , pra nga zemra drejt enëve të gjakut , sepse valvolat e zemrës nuk lejojnë rrjedhjen e tij në drejtim të kundërt . Mushkëritë realizojnë shkëmbimin e gazeve , sepse ” muret ” e alveolave pulmonare janë shumë të holla e kështu me radhë . Duke u njohur me marrëdhënien strukturë -funksion , do ta keni më të lehtë të kuptoni se si në zona të ndryshme të një organi të caktuar , realizohen funksione të ndryshme . P.sh , në segmente të ndryshme të tubulave të veshkës , qelizat që veshin nga brenda këto tubula kanë struktura të ndryshme nga njëra – tjetra . Kjo do të thotë se këto qeliza realizojnë funksione të ndryshme ( si ripërthithjen ose sekretimin tubular ) , edhe pse bëhet fjalë për të njëjtën njësi strukturore , pra për tubulat e veshkave .