Edhe sa kohë do të presin qytetarët e Kosovës për t’u pajisur me letërnjoftime?

loading...


Në gjysmën e muajit gusht, A.N nga një fshat i Prizrenit (emër i njohur për redaksinë), kishte aplikuar për t’u pajisur me letërnjoftim të ri të Kosovës, pasi i kishte skaduar letërnjoftimi i vjetër.

Por, ai dhe shumë qytetarë të tjerë të Kosovës, s’ kanë mundur të pajisen me këtë dokument për shkak të mungesës së materialit për të prodhuar letërnjoftim. Mungesë ka pasur në të gjitha komunat.

Duke e pasur të domosdoshëm letërnjoftimin, ai u detyrua që dy muaj më vonë të aplikonte përsëri për t’u pajisur me këtë dokument. Por, këtë herë kishte aplikuar përmes procedurës së shpejt.

“Më 13 gusht kam aplikuar për letërnjoftim. s’ ka dalë. Pastaj jam detyruar të aplikoj me procedurë të shpejt. Kur shkoja në qendër të regjistrimit, më thoshin s’ ka material. Jam detyruar të paguaj edhe 50 euro shtesë për të marr letërnjoftimin”, thotë ai.

Agon Hysaj nga Demokraci Plus, thotë për Radion Evropa e Lirë se vonesat për t’u pajisur me letërnjoftime dhe pasaporta, po i shkaktojnë probleme qytetarëve.

Hysaj thotë se edhe pasaportat e skaduara s’ mund të vazhdohen dhe qytetarët rrjedhimisht s’ mund të udhëtojnë jashtë vendit.

“Ministria e Punëve të Brendshme është arsyetuar se nga rrethanat e krijuara si pasojë e pandemisë s’ ka arritur që t’i kryejë me kohë ecuritë e prokurimit për këtë furnizim. Mirëpo ky s’ është një arsyetim i pranueshëm, pasi pandemia është edhe tani në mesin tonë dhe furnizimi me letërnjoftime dhe pasaporta është çështje shumë e ndjeshme dhe s’ munden qytetarët të penalizohen për faj të institucionit”, thotë Hysaj.

Tenderin për furnizim me letërnjoftime dhe pasaporta për vitin 2020-2021, tashmë e ka fituar kompania e njëjtë që ka bërë furnizimin deri më tani. Ka disa vjet që furnizimin me letërnjoftim e bënë kompania gjermane “Veridos”, që ka selinë në Kosovë.

Sipas kontratës, kompania fituese do të furnizojë ministrinë me 250 mijë letërnjoftime elektronike dhe me 50 mijë pasaporta.

Mbi 1 milion e 200 e mijë euro do t’i kushtojë Ministrisë së Punëve të Brendshme furnizimi me këto materiale.

Radio Evropa e Lirë ka provuar të marr një përgjigje nga kjo ministri për të mësuar se kur do të fillojnë qytetarët të marrin letërnjoftimet e reja, por të njëjtin s’ janë përgjigjur.

Më herët gjatë këtij muaji, ministri i Brendshëm, Agim Veliu kishte thënë në Kuvendin e Kosovës se “në qershor të vitit 2019 kanë kërkuar buxhet nga Ministria e Financave, për dokumente, por që s’ është bërë ndarja e buxhetit”.

Sipas Veliut, MPB kërkesë për buxhet shtesë kishte bërë edhe në muajin shkurt, por s’ është aprovuar.

Në fillim të muajit të kaluar, Ministria e Punëve të Brendshme njoftoi qytetarët e Republikës së Kosovës, se nga rrethanat e krijuara si pasojë e pandemisë COVID-19, Agjencia e Regjistrimit Civil, s’ ka arritur me kohë të duhur të kryejë të gjitha ecuritë e nevojshme për furnizim me material të mjaftueshëm për letërnjoftime.

Si pasojë, shumë qytetarë të Republikës së Kosovës, të cilët kanë aplikuar për letërnjoftim, s’ kanë arritur që të pajisen në kohën e paraparë./REL



Related posts