Vitamina B6 – Roli dhe funksioni i saj

loading...

Vitamina B6 është një kompleks komponimesh i përbërë nga tri komponente (piridoksin, piridoksal dhe piridoksamin) nga të cilat secila ka vlerat e saja biologjike.

Vitamina B6 lind si koenzimë në procesin e dekarboksilimit të aminoacideve, transaminimit, sintezës dhe zbërthimit të triptofanit, përveç saj ka rol të rëndësishèm dhe në metabolizmin e acideve yndyrore të pangopura.

Mendohet që Vitamina B6 ka rol të favorshëm në mbrojtjen e organizmit nga rrezatimi i rrezeve rentgen dhe rrezatimeve tjera jonizuese.

Mungesa e theksuar e Vitaminës B6 mund të manifestohet me lëkurë të yndyrshme (seborea) dhe me ndryshime psikologjike në organizëm (ngjashëm me pelagrën), por edhe me anemi mikrocitare hipokrome.

Burimet natyrore të Vitaminës B6  përfaqësohen në llojet e të gjitha produkteve, por, megjithate, më shumë gjendet te maja, drithërat, mishi dhe organet e brendshme, veçanerisht mëlçia dhe qumështi (nga 0,2 – 0,7 mg%).

Vitamina B6 është mjaft rezistente ndaj të nxehtit, veprimit të acideve dhe alkaleve, si dhe në ushqimin e përgatitur termikisht ka një sasi të mjaftueshme të kësaj vitamine.

Vitamina B6 është tepër e rëndësishme në trupin tonë, duke qenë se merr pjesë në kryerjen e shumë funksioneve. Ajo ndikon në gjendjen e oreksit, gjumit, të menduarit dhe humorit tonë. Trupi ka nevojë për vitaminë B6 për të luftuar infeksionet, për të konvertuar ushqimin në energji dhe për të ndihmuar gjakun në transportin e oksigjenit në të gjithë pjesët.

Çfarë shkakton mungesa e vitaminës B6?


Mungesë energjie


Niveli i ulët i vitaminës B6 mund të shkaktoj aneminë, që do të thotë nivel i ulët i rruazave të kuqe në gjak. Kjo mund t’ju bëjë të ndiheni të lodhur dhe të dobët fizikisht. Anemia mund të shkaktohet edhe për shkak të sasisë së ulët të hekurit në trup si dhe nga niveli i ulët i vitaminave të tjera si B12 apo folatet.

Ndryshime në lëkurë

Shenjat e mungesës së vitaminës B6 mund të pasqyrohen edhe në fytyrë pasi trupi përjeton ndryshime kimike. Çfarë vihet re më shpesh është një skuqje zakonisht në fytyrë e quajtur dermatit seborrheic. Me kalimin e kohës kjo skuqje mund të bëhet gjithnjë e më e dukshme. Nëse keni mungesë të vogël të vitaminës B6 simptomat mund të duan muaj apo edhe vite për t’u shfaqur.

Buzë të thata, të plasaritura

Goja mund të jetë një pjesë e mirë e trupit për të dalluar mungesën e vitaminës B6. Mungesa e vitaminës B6 mund të shfaqet me tharje dhe çarje të buzëve dhe kryesisht në këndet e buzëve dhe ënjtje të gjuhës.

Sistem imunitar i dobët

Mungesa e sasisë së vitaminës B6 mund ta bëjë që trupi juaj të jetë më i predispozuar ndaj infeksioneve dhe sëmundjeve. Kjo gjendje mund të kthehet në një rreth vicioz, sepse vet kanceri për shembull dhe sëmundje të tjera varfërojnë magazinat e vitaminës B6. Për këtë arsye është e nevojshme plotësimi i mungesës dhe kjo mund të rregullohet lehtësisht duke përdorur suplemente të B6-ës.

Mpirje të duarve dhe këmbëve

Keni ndjesi shpuese në gishtërinj apo i ndieni këmbët e mpira? Këto mund të jenë si rezultat i një çrregullimi nervor i quajtur neuropati periferike. Mungesa e vitaminës B6 mund të ndikojë si nxitës i neuropatisë periferike. Vitamina B6 dhe vitamina të tjera B si vitamina B12 janë thelbësore në mbajtjen e qelizave nervore të shëndetshme.

Fëmijë nevrik

Kur shikoni një foshnje vazhdimisht të bezdisur pa një shkak të caktuar, mund të jetë edhe për shkak të mungesës së vitaminës B6. Kjo mund të ndodhë nëse foshnja ushqehet vetëm me qumësht gjiri për më shumë se 6 muaj. Mungesa e vitaminës B6 mund të shkaktojë deri edhe atak konvulsiv te foshnjat, por po ashtu mund të bëjë që fëmija të ketë një dëgjim më sensitiv dhe zhurmat mund të jenë shumë shqetësuese për të.

Nauze

Gratë shtatëzëna kanë nevojë për sasi më të lartë të vitaminë B6 në dietën e tyre. Nëse ndiheni keq, keni përzierje apo të vjella (jo vetëm në mëngjes), një suplement vitamine B6 mund t’ju ndihmojë, por duhet marrë vetëm me rekomandimin e mjekut.

Ndiheni të hutuar

B6 ju ndihmon të rregulloni humorin dhe kujtesën. Nëse vini re se ndiheni konfuz ose të trishtuar, veçanërisht kur jeni i moshuar, kjo mund të jetë si pasojë e nivelit të ulët të vitaminës B6. Vitamina B6 zakonisht funksionon paralelisht me vitamina të tjera B, nëse keni nivel të ulët të tyre, aftësitë tuaja mendore mund të ngadalësohen.

Kanceri

Nivelet e ulëta të B6 mund të luajnë rol në riskun ndaj kancerit edhe pse studiuesit për këtë ende nuk kanë një përgjigje konkrete. Studimet kanë treguar një lidhje mes mungesës së vitaminës B6 dhe kancerit të stomakut dhe të ezofagut. Në rast se keni sasi të ulëta të saj mund të jeni më të predispozuar ndaj kancerit të gjirit ose prostatës, tumore të cilat ushqehen nga hormonet.

 

Related posts

Leave a Reply

Your email address will not be published. Required fields are marked *